ئه‌مڕۆ ساڵێک بەسەر کوژرانی قاسم سولەیمانی و ئەبو مەهدی موهەندیسدا تێپەڕدەبێت

ڕێژنه‌ میدیا

بەرەبەیانی رۆژی 3ـی کانوونی دووەمی ساڵی 2020 زۆرینەی خەڵکی عێراق لەگەڵ بڵاوبوونەوەی هەواڵی کوژرانی قاسم سولەیمانی و ئەبو مەهدی موهەندیسدا بەخەبەرهاتن، روداوێک کەوەک سەرەتایەک بۆ کردنی عێراق بەچەقی ململانێ سەربازی چەکدارییەکان خوێندنەوەی بۆ کرا و ئەمڕۆش دوای ساڵێک ئاسەوارەکانی ئەو روداوە و کاریگەرییەکانی بەردەوامییان هەیە.

به‌ره‌به‌یانی رۆژی هه‌ینی ( 3ـی کانوونی دووەمی ساڵی 2020) له‌ هێرشێكی موشه‌كی فرۆكه‌كانی ئه‌مریكا بۆ سه‌ر دوو ئۆتۆمبێل له‌ نزیك فرۆكه‌خانه‌ی به‌غدا، هه‌ریه‌ك له‌ قاسم سوله‌یمانی، فه‌رمانده‌ی گشتی فه‌یله‌قی قودسی سوپای پاسدارانی ئێران و ئه‌بو مه‌هدی موهه‌ندیس، جێگری سه‌رۆكی ده‌سته‌ی حه‌شدی شه‌عبی و لانیکەم 10 كه‌سی دیكه‌ كوژران.

ئەو فڕۆکەیەی قاسم سولەیمانی و ئەبومەهدی موهەندیس تێدابوو کاتژمێر 12:32 خولەکی بەرەبەیانی 3ی کانوونی دووەمی 2020 دەگاتە فڕۆکەخانەی بەغدا و بڕیاربوو ئەو رۆژە، سولەیمانی و عادل عەبدولمەهدی، سەرۆکوەزیرانی پێشوی عێراق کۆببنەوە.

دوای نزیکەی 20 خولەک لە گەیشتنی فڕۆکەکە، دوو ئۆتۆمبێلەکەی قاسم سولەیمانی و ئەبومەهدی موهەندیس لە فڕۆکەخانەی بەغدا دەردەکەون و لەلایەن فڕۆکەی بێفڕۆکەوانی ئەمریکی لە جۆری “ئێم کیو ناین ریپەر”ەوە بە سێ مووشەک دەکرێنە ئامانج و هەموویان دەستبەجێ دەکوژرێن.