هاوسەرگیری پیاوە بەتەمەنەكە و كچە مێردمنداڵەكە هەڵوەشایەوە

ڕێژنه‌ میدیا
 
 
 
 
دوای بڵاوبوونەوەی هەواڵی هاوسەرگیركردنی پیاوێكی تەمەن 65 ساڵ و كچێكی 14 ساڵ لەسنوری پارێزگای موسڵ، لەژێر فشاری تۆڕە كۆمەڵایەتییەكان هاوسەرگیرییەكە هەڵوەشایەوە.
 
جەھوەر عەلی بەگ، بریكاری میری ئێزدییەكان  رایگەیاند:” دوای بڵاوبوونەوەی ئەو بابەتە كە پیاوێكی بەتەمەن لە گوندی خەتارێ سەر بە ناحیەی تلكێف پرۆسەی ھاوسەرگیری لەگەڵ كچێكی منداڵدا ئەنجامداوە خۆم لەسەر بابەتەكەیان ھاتومەتە دەنگ”.
 
ناوبراو ئاماژەی بەوەكرد “پرۆسەكە ھەڵوەشێنرایەوە و پڕۆسەی مارەكردنی كچەكە بەشێوەیەكی یاسایی نەكرابوو، خۆیشی ئەو پیاوەی بە دڵی نەبوو پیاوەكەش دڵی لەسەر كچەكە نەمابوو، ئێمەش رێگەمان پێنەدا كارەكانی تەواو بكات و بەبێ كێشە لێك جیابوونەتەوە”.
 
 ماوەی ھەفتەیەكە ھاوڵاتیەكی 65 ساڵ لەگوندی خەتارێ لە سنوری ناحیەی ئەلقوشی سەر بەقەزای تلكێف لەپارێزگای موسڵ، كچێكی تەمەن 14 بۆ 15 ساڵی مارە كردووە، بەڵام لەبەر دروستبوونی ناڕەزایی، بەنیازە پڕۆسەكە هەڵبوەشێنێتەوە.
 
هەر بەپێی زانیارییەكان ، پێشتر ماڵی ئەو پیاوە لە كۆمەڵگای دومیزی سەر بە ناحیەی فەیدییە بووە و ھاتووە ئەو كچەی لە گوندی خەتارێ مارە كردووە، دوای پێكھێنانی ئەو پرۆسەیەش خەڵكێكی زۆر پەیوەندی پێوەكردووە لەسەر ئەو بابەتە، هەر بەپێی زانیارییەكان ئەو پیاوە لەسەر ئەو قسانەی لەسەری دەكرێن بەنیازە لەكچەكە جیاببێتەوە.
 
زانیارییەكان ئاماژە بەوەش دەكەن ئەو پیاوە خێزاندارەو منداڵیشی ھەیە، بەڵام خۆی وتویەتی “ھاوسەرەكەم نەخۆشی ھەیە و لە بەرئەوە ئەو كچەم مارە كردووە”.
 
گوندی خەتارێ گەورەترین گوندی عێراق و كوردستانە، دانیشتوانی نزیكەی 14 ھەزار كەسن و سەرجەمیان كوردانی ئێزدین كە سەر بە ناحیەی تلكێفە سەر بە پارێزگای موسڵ.